ජාත්‍යන්තර වේදිකාවල ප්‍රමිතීන්ට අනුකූලව තරඟ කිරීමට ශ්‍රී ලාංකික තරුණයින් හැඩ ගැස්වීම ජාතික යොවුන් සේනාංකයේ වගකීමයි.
ජාත්‍යන්තර ප්‍රමිතීන්ට සමාන මානව ගුණාංගවලින් පිරිපුන් සහ සමාජයේ අවශ්‍යතාවයන්ට සංවේදී වන සහ රටේ අනාගත සංවර්ධනයේ කොටස්කරුවෙකු වීමට ශක්තිමත් ශ්‍රී ලාංකික තරුණයෙකු බිහි කිරීමේ දැඩි අවශ්‍යතාවයට ජාතිය මුහුණ දී සිටී. මේ අනුව බලන විට තරුණයින්ගේ හැකියාවන් උත්තේජනය කරන ප්‍රවේශයක් තුළින් වඩාත් බලාපොරොත්තු සහගත වාතාවරණයක් නිර්මාණය කිරීමට සහ අවශ්‍ය ආකල්පමය වෙනසක් ඇති කිරීමට ධනාත්මකව සිතීමට ඔවුන් දිරිමත් කිරීමට අපි පෙරමුණේ සිටම නායකත්වය දිය යුතුයි. තරුණ හා ක්‍රීඩා අමාත්‍යාංශයේ මඟ පෙන්වීම යටතේ ජාතික යොවුන් සේනාංකයේ මූලික හා ජාතික වගකීම වන්නේ ජාතියට දැනුම, ආකල්ප සහ කුසලතාවයන්ගෙන් සපිරි ශක්තිමත් තරුණ පරපුරක් දායාද කිරීමයි. අපේ අභිලාෂය වනුයේ විනය හා නායකත්වයෙන් යුතුව අනාගත ලෝකයට පිය නැගීමට සූදානම් වන රටට සේවයක් කරන තරුණ පරපුරක් බිහිකිරීමයි. මෙම වගකීම දැරීම සඳහා ජාතික යොවුන් සේනාංකය මුළුමනින්ම කැපවී සිටින පුහුණු ආයතනයක් ලෙස සන්නද්ධව සිටී. අපේ රටේ තරුණ තරුණියන්ගේ අනාගත සිහින හා ඉලක්ක සපුරා ගැනීමට යන ගමන්මඟ පිළිබඳව මගේ උණුසුම් සුබපැතුම් පිරිනමන අතර ජාතික යොවුන් සේනාංකයේ නොමසුරු උත්සාහය තුළින් ලබා දී ඇති මෙම අවස්ථාවෙන් ප්‍රයෝජන ගැනීමට ශ්‍රී ලාංකේය තාරුණ්‍යයට ආරාධනා කරමි. ජාතික යොවුන් සේනාංකය මුළුමනින්ම කැපවී සිටින්නේ විනය, නායකත්වය සහ පෞරුෂයකින් යුත් තරුණ පිරිසක් බිහිකිරීම උදෙසා ය.
